පිළිතුර
1980 අංක 44 දරන ඡන්දහිමියන් ලියාපදිංචි කිරීමේ පනත හා එම පනතට සිදුකළ සංශෝධන අනුව, එය 2022 වර්ෂයේ සිට අවුරුද්දකම පෙබරවාරි මස 01 වැනි දින ආරම්භ කෙරේ. වාර්ෂිකව සිදු කරන ඡන්දහිමි නාමලේඛන ප්‍රතිශෝධනය යටතේ පදිංචිකරුවන් සිටින සෑම නිවසකටම නම් ගැනීමේ (BC) ආකෘතියක් පෙබරවාරි/ මාර්තු මාසවලදී බෙදා දෙනු ලැබේ. මෙම කාර්යය සිදුකරනු ලබන්නේ ප්‍රධාන වශයෙන් ග්‍රාම නිලධාරින් මඟිනි. නමුත් අධික ජනගහනයක් ඇති කොළඹ හා දෙහිවල - ගල්කිස්ස මහ නගර සභා ප්‍රදේශවල සහ මීගමුව මහ නගර සභාවේ සමහර ප්‍රදේශවල මෙම කාර්යය විශේෂ ගණන් ගන්නා නිලධාරින් මඟින් සිදු කරනු ලැබේ. ගෘහ මූලිකයා විසින් සම්පූර්ණ කරන ලද ගණන් ගැනීමේ ආකෘතිය ගණන් ගන්නා නිලධාරින් විසින් එකතු කර, සෑම නමක්ම පරීක්ෂා කර බලා තම නිර්දේශය සටහන් කොට ඉදිරි කටයුතු කර දිස්ත්‍රික් මැතිවරණ කාර්යාලවලට භාරදෙනු ලැබේ. ඉන්පසු දිස්ත්‍රික් මැතිවරණ කාර්යාල නිලධාරින් විසින් ලියවිලි පරීක්ෂා කර, එක් එක් නිවසේ වත්මන් නාමලේඛනයේ තිබී ඉවත් කරනු ලබන අයගේ නම් ලැයිස්තුවක් “අ” ලැයිස්තුව (A List) සහ අළුතින් ඇතුළුවන අයගේ නම් අඩංගු ලැයිස්තුවක් “ආ” ලැයිස්තුව (B List) සකස් කර එය දින 28 ක් තුළ දිස්ත්‍රික් මැතිවරණ කාර්යාලය, ප්‍රාදේශීය ලේකම් කාර්යාලය, ග්‍රාම නිලධාරි කාර්යාලය, පළාත් පාලන ආයතන කාර්යාලය ආදී ස්ථානවල මහජනයාගේ පරීක්ෂාව සඳහා ප්‍රදර්ශනය කරනු ලැබේ. මෙම ප්‍රදර්ශණය දින 28ක් තුළ සිදු කරනු ලැබේ. ඡන්දහිමි නාමලේඛනයට නම ඇතුල් කිරීම සඳහා නම් ගණන් නොගෙන ඇති අයෙකුට හිමිකම් ඉල්ලීමක් හෝ ගණන් ගෙන ඇති පුද්ගලයෙකුට විරුද්ධව විරෝධතා ඉල්ලීමක් එම දින 28 තුළදී දිස්ත්‍රික්කයේ ලියාපදිංචි කිරීමේ නිලධාරි (දිස්ත්‍රි ලේකම්) ට හෝ සහකාර ලියාපදිංචි කිරීමේ නිලධාරි (නියෝජ්‍ය /සහකාර මැතිවරණ කොමසාරිස්වරුන් ) ට ඉදිරිපත් කළ හැක. ඉන්පසු හිමිකම් සහ විරෝධතාවයන් පිළිබඳව පරීක්ෂණ පවත්වා තීරණ ගෙන, ඉන් පසුව නාමලේඛනය සකස් කර, ඊළග වර්ෂයේ ජනවාරි 31 හෝ ඊට පෙර සහතික කරනු ලැබේ.
සැ.යු.- 2021 හා 2022 වර්ෂවල රටෙහි පැවති අයහපත් සෞඛ්යාය වාතාවරණය හේතුවෙන් ගෙයින් ගෙට ගොස් ඡන්දහිමියන් ගණන් ගැනීමේ කටයුතු සිදු නොවීය.
