இலங்கை சனநாயக சோசலிசக் குடியரசின் அரசியலமைப்பில் 2001 ஆம் ஆண்டு மேற்கொள்ளப்பட்ட 17 ஆம் அரசியலமைப்புத் திருத்தத்தின் மூலம் சுயாதீன ஆணைக்குழுக்களைத் தாபிப்பதற்கான சட்ட ஏற்பாடுகள் உள்ளடக்கப்பட்டுள்ளன. இதன் மூலம் தாபிப்பதற்கு உத்தேசிக்கப்பட்ட ஆணைக்குழுக்களின் எண்ணிக்கை (7) ஆகும். "தேர்தல் ஆணைக்குழு" என்பது புதிதாக தாபிப்பதற்கு முன்மொழியப்பட்ட ஆணைக்குழுவாகும்.

ஆணைக்குழுவிற்கு உறுப்பினர்களை நியமிப்பதற்கான விசேட முறையொன்று அரசியலமைப்பின் மூலம் கையாளப்பட்டது. அதாவது, 17 ஆம் திருத்தத்தின் மூலம் தாபிக்கப்படவிருந்த "அரசியலமைப்புப் பேரவை" மூலம் தேர்தல் ஆணைக்குழு உட்பட ஏனைய ஆணைக்குழுக்களுக்கான உறுப்பினர்கள் மற்றும் தவிசாளர்களின் பெயர்களைப் பரிந்துரை செய்ய வேண்டியிருந்தது. அதன் பிரகாரம், அரசியலமைப்புப் பேரவையின் பரிந்துரையின்றி ஜனாதிபதியினால் ஆணைக்குழுவிற்காக எவரையும் நியமிக்க முடியாது என்பது ஒரு சிறப்பம்சமாகும். அரசியலமைப்புப் பேரவையினால் பரிந்துரைக்கப்படும் பெயர்களை ஜனாதிபதியினால் 14 நாட்களுக்குள் நியமிக்கத் தவறினால், அவர்கள் ஆணைக்குழுவின் உறுப்பினர்களாக நியமிக்கப்பட்டதாகக் கருதப்படும்.

17ஆம் திருத்தத்தின் கீழ் தேர்தல் ஆணைக்குழுவைத் தாபிக்க முடியவில்லை. அதற்குக் காரணம் அரசியலமைப்புப் பேரவையினால் பரிந்துரைக்கப்பட்ட நபர்களை நியமிப்பதில் எழுந்த சிக்கலான நிலைமைகள் ஆகும். அதேபோல், அரசியலமைப்புப் பேரவை இரண்டாம் முறை நியமனம் செய்தல் தொடர்பான சிக்கல்கள் காரணமாகவும், தேர்தல் ஆணைக்குழு தாபிக்கப்படவில்லை.

17ஆம் திருத்தத்தின் கீழ் நியமிக்கப்பட வேண்டிய தேர்தல் ஆணைக்குழு ஐந்து உறுப்பினர்களைக் கொண்டதாகும். அதன் கூட்ட குறை நிறைவெண் மூன்று ஆகும். இருப்பினும், 19 ஆம் அரசியலமைப்புத் திருத்தத்தின் மூலம் சுயாதீன ஆணைக்குழு உறுப்பினர்களை நியமிப்பதற்காக அரசியலமைப்புப் பேரவைக்கு பதிலாக "பாராளுமன்றப் பேரவை" எனும் பேரவை தாபிக்கப்பட்டது. அதேபோன்று தேர்தல் ஆணைக்குழுவின் உறுப்பினர்களின் எண்ணிக்கை மூன்று வரை குறைக்கப்பட்டுள்ளது. இந்தத் திருத்தங்களுக்கு அமைய பாராளுமன்றப் பேரவையின் பரிந்துரையின்றி சனாதிபதியினால் ஆணைக்குழு உறுப்பினர்களை நியமனம் செய்வதற்கு முடியாது.

தேர்தல் ஆணைக்குழு உட்பட ஏனைய ஆணைக்குழுக்களைத் தாபித்தல் தொடர்பாக சிவில் சமூகத்தினர் மற்றும் அரசியல் கட்சிகளிடையே காணப்பட்ட அழுத்தங்கள் மற்றும் கோரிக்கைகள் வலுப்பெற்றதன் காரணமாகவும், அதற்காக காட்டப்பட்ட ஆர்வம் காரணமாகவும் 2015 ஆம் ஆண்டு 19ஆம் திருத்தமானது புதிய அரசியலமைப்புத் திருத்தமாக முன்வைக்கப்பட்டது. அந்தத் திருத்தத்திற்கு அமைய தேர்தல் ஆணைக்குழு உறுப்பினர்களின் எண்ணிக்கை மூன்றாக குறைக்கப்பட்டது. இருப்பினும் மூன்றாக காணப்பட்ட குறை நிறைவெண் எண்ணிக்கை குறைக்கப்பட்டிருக்கவில்லை , ஆணைக்குழுவின் உறுப்பினர்களாக நியமனம் செய்வதற்குத் தேவையான தகுதிகள் அரசியலமைப்பின் மூலம் நிர்ணயிக்கப்பட்டுள்ளன. அதன் பிரகாரம் தொழில், நிர்வாக மற்றும் கல்வி ஆகிய துறைகளில் விசேட தேர்ச்சி பெற்ற இருவர் மற்றும் பிரதி தேர்தல்கள் ஆணையாளர் அல்லது அதற்கு மேற்பட்ட பதவியை வகித்த தேர்தல்கள் திணைக்களத்தின் ஓய்வுபெற்ற அலுவலர் ஒருவரை ஆணைக்குழுவின் உறுப்பினராக நியமனம் செய்தல் வேண்டும் என்பதோடு அவர்களுள் ஒருவரை சனாதிபதி அவர்கள் தவிசாளராக நியமனம் செய்தல் வேண்டும். புதிய விதிகளின் கீழ் அரசியலமைப்புப் பேரவையினால் பரிந்துரைக்கப்படும் பெயர்களை நியமனம் செய்யாமல் இருப்பதற்கு ஜனாதிபதிக்கு அவகாசம் இல்லை.

மேலும் பாராளுமன்ற உறுப்பினரொருவர் அல்லது மாகாண சபை உறுப்பினரொருவர், உள்ளூர் அதிகார சபை உறுப்பினரொருவர், நீதித்துறை சேவையின் அதிகாரியொருவர் அல்லது அரச அதிகாரியொருவர் தேர்தல் ஆணைக்குழுவின் உறுப்பினராக நியமனம் செய்வதற்கு முடியாது என அரசியலமைப்பின் மூலம் விதிக்கப்படுத்தப்பட்டுள்ளது. தேர்தல் ஆணைக்குழுவின் உறுப்பினர்களின் பதவிக்காலம் ஐந்து ஆண்டுகளாகும். பதவிக்காலத்தின் போது ஓர் உறுப்பினரை நீக்க வேண்டுமானால், உயர் நீதிமன்றம் அல்லது மேன்முறையீட்டு நீதிமன்றத்தின் நீதிபதி ஒருவரை நீக்குவதற்கான நடைமுறைகள் பின்பற்றப்படுதல் வேண்டும்.

தேர்தல் ஆணைக்குழு நியமனம் செய்வதற்குப்பட்ட காலத்தின் போது தேர்தல்கள் திணைக்களம் செயற்பாட்டில் இருந்த்தோடு "தேர்தல்கள் திணைக்களம்" மற்றும் "தேர்தல்கள் ஆணையாளர்" ஆகிய சொற்களுக்குப் பதிலாக "தேர்தல் ஆணைக்குழு" என்ற சொல் பதிலீடுசெய்யப்படல் வேண்டும் என அரசியலமைப்பின் 49 (3) (அ) பிரிவில் குறிப்பிடப்பட்டுள்ள விதிகளின் பிரகாரம், 1955.10.01 ஆம் திகதி தொடக்கம் காணப்பட்டு வந்த தேர்தல்கள் திணைக்களம் 2015.11.17 தொடக்கம் இல்லாதொழிந்த்து. "தேர்தல்கள் ஆணையாளர்" வசம் காணப்பட்ட அதிகாரங்கள் தேர்தல் ஆணைக்குழுவிற்கு வழங்கப்பட்டதென்பது அதன் கருத்தாகும்.

தேர்தல்கள் திணைக்களம் இல்லாதொழிந்ததைத் தொடர்ந்து அதன் அதிகாரங்கள் மற்றும் பணிப் பொறுப்புக்கள், பௌதிக மற்றும் மனித வளங்கள் தேர்தல் ஆணைக்குழுவிற்கு மாற்றப்பட்டன. அதன்படி, தேர்தல் ஆணைக்குழு புதிதாக தாபிக்கப்பட்ட போதிலும், அதற்கான பணியாட்குழு அல்லது பௌதிக வளங்கள் தொடர்பாக விசேட சிக்கல்கள் ஏதும் ஏற்படவில்லை. 2/බප/15/1908/701/018 இலக்க மற்றும் 2015.12.08 ஆம் திகதிய அமைச்சரவைப் பத்திரம் தொடர்பான அமைச்சரவை முடிவின் பிரகாரம், தேர்தல்கள் திணைக்களத்தின் கீழ் பணியில் ஈடுபட்டிருந்த பதவிநிலை அதிகாரிகள் உட்பட அனைவரும், அவர்கள் அனுபவித்து வந்த உரிமைகள் மற்றும் வரப்பிரசாதங்களுடன் தேர்தல் ஆணைக்குழுவிற்கு இணைப்புச் செய்யப்பட்டனர்.

அரசியலமைப்பின் 13ஆம் திருத்தத்தின் பிரகாரம், 103 (2) உறுப்புரையில், சுதந்திரமான மற்றும் நீதியான தேர்தல்களை நடாத்துவது மற்றும் மக்கள் தீர்ப்புக்களை நடாத்துவது தேர்தல் ஆணைக்குழுவின் குறிக்கோளாக இருத்தல் வேண்டும். மற்றும் காணப்படுகின்ற தேர்தல்கள் சட்டங்களுக்கு அமைய, தேர்தல்களை நடாத்துதல் மற்றும் வருடாந்தம் தேருநர் இடாப்புக்களைத் தயாரித்தல் ஆகியவற்றுக்கு ஆணைக்குழுவிற்கு அதிகாரங்கள் உள்ளதோடு, ஆணைக்குழுவின் செயல்பாடுகள் அந்த அதிகாரங்களுக்கு மாத்திரம் மட்டுப்படுத்தப்பட்டவையல்ல என அரசியலமைப்பின் 104 (1) உறுப்புரையில் குறிப்பிடப்பட்டுள்ளது.குறித்த சட்ட விதிகளுக்கு அமைய , தேர்தல்களை நடத்துவதற்கான பொறுப்பு, கையளிக்கப்பட்ட தேர்தல்கள் திணைக்களத்தை விட தேர்தல் ஆணைக்குழுவிற்கு அதிக முக்கியத்துவம் வாய்ந்த ஒரு பொறுப்பாக வழங்கப்பட்டுள்ளது. அதனுடன் தொடர்புடையதாக 19ஆம் யாப்புத் திருத்தத்தின் மூலம் அடிப்படைச் சட்டங்களில் விசேட விதிகள் உட்சேர்க்கப்பட்டுள்ளதால் ஆணைக்குழுவின் அதிகாரங்கள் மற்றும் பலம் என்பன மேலும் அதிகரிக்கப்பட்டுள்ளன.

தேர்தல் ஆணைக்குழுவை தாபிக்கும்போது அதற்கு வழங்கப்பட்டுள்ள விசேட அதிகாரங்கள் 104 (இ) உறுப்புரையின் கீழ் வருமாறு:

01. ஆணைக்குழுவின் முடிவுகள், விதிகள் அல்லது நடவடிக்கைகள் இறுதி மற்றும் தீர்மானகரமானவையாக இருத்தல்.

02. தேர்தல் ஆணைக்குழுவிற்கு எதிராக சிவில் வழக்கு அல்லது தண்டனை நடவடிக்கைகள் எவற்றையும் தொடர முடியாது.

இந்த விசேட அதிகாரங்கள், அரசியலமைப்பின் 126ஆம் உறுப்புரையின் கீழ் அடிப்படை உரிமை மீறல் தொடர்பான மேன்முறையீட்டு அதிகாரம், 130ஆம் உறுப்புரையின் கீழ் ஜனாதிபதி தேர்தல்கள், தேர்தல்கள் மனுக்கள் தொடர்பான மேன்முறையீட்டு அதிகாரம் மற்றும் 144ஆம் உறுப்புரையின் கீழ் உறுப்பிரொருவராகத் தெரிவாவது தொடர்பான தேர்தல்கள் மனுக்கள் மீதான மேன்முறையீட்டு அதிகாரத்திற்கு உட்பட்டதாகும்.

மேலும், தேர்தல்கள் செயல்முறையை மேற்கொள்ளும் போது சட்டங்களை செயல் வலுப்படுத்துதல், பாதுகாத்தல் மற்றும் வருடாந்த நிர்வாக/தேர்தல்கள்/ வாக்கெடுப்பு அறிக்கைகளைப் பாராளுமன்றத்தில் சமர்ப்பித்தல் தவிர வேறு பொறுப்புக்களுக்கு ஆணைக்குழு கட்டுப்படவில்லை என்பது விசேடமான விடயம் ஒன்றாகும். இது தவிர அரச சொத்துக்கள் துஷ்பிரயோகம் தொடர்பான விசேட அதிகாரங்கள் 104 ஆ (4) (அ) உறுப்புரையின் கீழ் வழங்கப்பட்டுள்ளதோடு தேர்தல்கள் காலங்களின்போது அரச ஊடகங்கள் உட்பட அனைத்து ஊடகங்களையும் கையாள்வது தொடர்பான ஊடக வழிகாட்டு நெறிகளை விதிப்பதற்கும் மற்றும் அது தொடர்பான விதிகளை உருவாக்குவதற்கும் ஏற்பாடுகள் செய்யப்பட்டுள்ளன. 104 இ ஆம் உறுப்புரையின் கீழ் பொலிஸ் அதிகாரங்களைப் பயன்படுத்துவதற்கும், 104 ஈ ஆம் உறுப்புரையின் கீழ் ஆயுதப்படையினரைப் பயன்படுத்துவதற்கும் 19ஆம் அரசியலமைப்புத் திருத்தத்தின் கீழ் விசேட அதிகாரங்கள் ஆணைக்குழுவிற்கு வழங்கப்பட்டுள்ளன.

இதன்படி,நோக்கும் போது தேர்தல் ஆணைக்குழுவின் அதிகாரங்களை அதிகரிப்பதற்காக எடுக்கப்பட்டுள்ள நடவடிக்கைகள் பல உள்ளன. அதாவது:

01. ஆணைக்குழுவை தாபிப்பதற்கான விசேட விதிகள்;

02. தேர்தல்கள் நடவடிக்கைகள்கையளிக்கப்படும் அதிகாரிகளுக்கு, ஏனைய அரச பௌதீக மற்றும் மனித வளங்களைப் பெற்றுக்கொள்ளக்கூடிய வகையிலான ஏற்பாடுகள்;

03. ஆணைக்குழுவின் முடிவுகளில் காணப்படும் இறுதியான தன்மை மற்றும் அதற்கு வழக்கு நடவடிக்கைகளின் போது கிடைக்கின்ற சட்டக்கட்டுப்பாடற்ற சுதந்திரம்/விசேட அதிகாரங்கள்

04. அரச ஆதனங்கள் கட்சிகள்/வேட்பாளர்களை ஊக்குவிப்பதற்காகப் பயன்படுத்துவதை தடைசெய்வதற்குள்ள அதிகாரங்கள்;

05. தேர்தல்கள் காலப்பகுதியினுள் அச்சு மற்றும் இலத்திரனியல் ஊடகங்களுக்கான ஊடக வழிகாட்டல்கள் மற்றும் அறிவுறுத்தல்களை விதிக்கும் அதிகாரம்;

06. பாராளுமன்றம் கலைக்கப்பட்டுள்ளபோது தேர்தல்களில் தகாத செல்வாக்கு செலுத்துவதைத் தடுப்பதற்கான சட்டங்கள்;

07. நீதியான தேர்தல்கள் ஒன்றுக்கு உகந்த சூழலை உருவாக்குவது ஜனாதிபதியின் பொறுப்பொன்றாக கருதப்படும்.

மேற்கூறிய விடயங்களுக்கு அமைய, அந்த விசேட அதிகாரங்கள் மற்றும் சட்ட ஏற்பாடுகள் அரசியலமைப்பின் மூலம் செய்யப்பட்டுள்ளதன் ஊடாக, தேர்தல் ஆணைக்குழு தனது பணிகளையும் மற்றும் பொறுப்புக்களையும் நிறைவேற்றுவதற்கும், மற்றும் தேர்தல்கள் செயல்முறையை முன்னெடுப்பதற்கும் மற்றும் முகாமைத்துவம் செய்வதற்கும் தேவையான பலமும் மற்றும் அதிகாரமும் வழங்கப்பட்டுள்ளன என்பது உறுதியாகின்றது. ஆணைக்குழு அந்த அதிகாரங்களை நடைமுறைப்படுத்தும் போது, அதன் நடைமுறைச்சாத்திய நிலை மற்றும் பெறுபேறுகளைக் கணக்கிடுதல் வேண்டும்.

தேர்தல் ஆணைக்குழுவிற்கு 104 உ ஆம் உறுப்புரையின் மூலம் தேர்தல்கள் ஆணையாளர் நாயகம் ஒருவரை நியமிப்பதற்கான அதிகாரம் வழங்கப்பட்டுள்ளது. இந்த நியமனம் அரசியலமைப்புப் பேரவையின் இணக்கப்பாட்டுடன் நடைபெறுதல் வேண்டும். தேர்தல்கள் ஆணையாளர் நாயகம் ஆணைக்குழுவின் பணிப்புக்கள் மற்றும் ஆலோசனைகளின் பிரகாரம் செயற்பட வேண்டிய ஒருவராவார். தேர்தல்கள் ஆணையாளர் நாயகத்திற்கு ஆணைக்குழுவின் விதிகள் மற்றும் கட்டுப்பாடுகளுக்கும் உட்பட்டு ஆணைக்குழுவின் தீர்மானங்களைச் செயல்படுத்துவதற்கான அதிகாரம் உண்டு. தேர்தல்கள் ஆணையாளர் நாயகத்தின் பதவிக்காலத்தினுள் பதவியிலிருந்து நீக்குதல் தொடர்பில் விசேட ஏற்பாடுகள் செய்யப்பட்டுள்ளமை விசேட அம்சமாகும். தேர்தல்கள் திணைக்களம் காணப்பட்ட காலப்பகுதியின் போது தேர்தல்கள் ஆணையாளர் நாயகத்தின் பதவிக்காலம் 60 வயது வரையாக இருந்தது. இந்தப் பதவிக்காலத்தை தேவைப்பாட்டுக்கமைய ஒரு வருடத்தினால் கால நீடிப்புச் செய்வதற்கான அவகாசம் இருந்தது. எவ்வாறாயினும், தேர்தல்கள் ஆணைக்குழுவினால் நியமனம் செய்யப்படக்கூடிய தேர்தல்கள் ஆணையாளர் நாயகத்தின் வயது 65 வயது வரை ஆகுமென்பதோடு அந்த வயது எல்லைக்கு முன் அவரை நீக்க வேண்டுமானால், பாராளுமன்றத்தின் அனுமதியின் பிரகாரமாகும். அதாவது, இலங்கை அரசியலமைப்பின் 104 உ ஆம் உறுப்புரையின் விதிகளின் படி, அவர் இறந்தால் அல்லது பதவி விலகினாலன்றி, 65 வயது பூர்த்தியடையும் வரை அல்லது உடல் அல்லது மன ரீதியான பலவீனம் காரணமாக நீக்கினால் அவர் தொடர்ந்து பணியாற்ற முடியாத நிலை ஏற்பட்டால் அல்லது தவறு செய்திருந்தால், பாராளுமன்றத்தில் சமர்ப்பிக்கப்படும் விஞ்ஞாபனத்தின் மூலம் அவரை நீக்கம் செய்தாலன்றி அல்லது பதவி வெற்றிடமாக மாட்டாது.

இந்த நிலைமை காரணமாக, தேர்தல் ஆணைக்குழுவினால் தேர்தல்கள் ஆணையாளர் நாயகத்தின் பதவிக்காலம் 60 வயது வரை குறைத்தல் வேண்டும் என அரசியலமைப்புப் பேரவைக்குத் தெரிவிக்கப்பட்டது. அரசியலமைப்புப் பேரவையின் பரிந்துரைக்கு அமைய அமைச்சரவையினால் தேர்தல்கள் ஆணையாளர் நாயகத்தின் பதவிக்காலத்தை 60 வயது வரை குறைப்பதற்கு அனுமதித்து அரசியலமைப்புப் பேரவைக்குத் தேவையான சட்டத் திருத்தங்களை மேற்கொள்வதற்கான அவசியமான நடவடிக்கைகள் எடுக்கப்பட்டுள்ளன.

மேற்கூறப்பட்ட அரசியலமைப்பு விதிகளின் படி, முன்னாள்தேர்தல்கள் ஆணையாளர் மஹிந்த தேசப்பிரிய அவர்கள் (தவிசாளர்), ஜனாதிபதி சட்டத்தரணி என்.ஜே. நளின் அபேசேகர அவர்கள் (உறுப்பினர்), பேராசிரியர் எஸ். ரத்னஜீவன் எச். ஹூல் அவர்கள் (உறுப்பினர்) ஆகிய மூவர் அடங்கிய முதலாவது தேர்தல் ஆணைக்குழு நியமனம் செய்யப்பட்டது. 2015.11.13 ஆம் திகதி சனாதிபதியினால் நியமனம் செய்யப்பட்ட அந்த உறுப்பினர்கள் 2015.11.17 ஆம் திகதி தமது கடமைகளைப் பொறுப்பேற்று, தேர்தல் ஆணைக்குழுவின் முதலாவது கூட்டம் நடாத்தப்பட்டது. இதன்படி, 2015.11.17 ஆம் திகதி தொடக்கம் தேர்தல் ஆணைக்குழுவின் செயற்பாடுகள் ஆரம்பிக்கப்பட்டது.