தேர்தல் ஆணைக்குழுவிற்காக அரசியலமைப்பு சபையினால் தகைமையுடைய உறுப்பினர்களின் பெயர்கள் சனாதிபதி அவர்களுக்குப் பரிந்துரைக்கப்பட்டதைத் தொடர்ந்து, 2015 ஆம் ஆண்டு நவம்பர் மாதம் 13 ஆம் திகதி தேர்தல் ஆணைக்குழு தாபிக்கப்பட்டது.

இலங்கை அரசியலமைப்பின் பிரகாரம் , இறைமை மக்களிடமே உள்ளது. இதில் ஆட்சித் தத்துவங்கள், அடிப்படை உரிமைகள் மற்றும் வாக்குரிமை ஆகியவை உள்ளடங்கும். அரசியலமைப்பின் 17 வது திருத்தத்தின் கீழ், 103(2) உறுப்புரையின் பிரகாரம் , சுதந்திரமானதும் மற்றும் நீதியானதுமான தேர்தல்களையும் மற்றும் கருத்துக்கணிப்புகளையும் நடாத்துவதே தேர்தல் ஆணைக்குழுவின் குறிக்கோளாகுமெனக் குறிப்பிடப்பட்டுள்ளது. தேர்தல் சட்டங்களுக்கு இணங்க தேர்தல்களை நடத்துவதற்கும், வருடாந்த வாக்காளர் பெயர்ப் பட்டியலைத் தயாரிப்பதற்கும் ஆணைக்குழுவிற்கு அதிகாரம் வழங்கப்பட்டுள்ளது. அத்துடன், அரசியலமைப்பில் குறிப்பிடப்பட்டுள்ள சட்டங்களுக்கு அமைய தேர்தல்களை நடாத்தும் பொறுப்பும், அரசியல் கட்சிகளை அங்கீகரிக்கும் பொறுப்பும் தேர்தல் ஆணைக்குழுவிற்கு வழங்கப்பட்டுள்ள போதிலும், இவற்றுக்கு மாத்திரம் அதன் பணிகள் மட்டுப்படுத்தப்படவில்லை என்றும் குறிப்பிடப்பட்டுள்ளது.

மனித உரிமைகள் தொடர்பான உலகப் பிரகடனத்திற்கு இணங்க, நாட்டின் ஆட்சிமுறையில் மக்கள் பங்கெடுப்பதற்கான வாய்ப்புகளை வழங்க வேண்டியதன் அவசியத்தை ஆராய்ந்து பார்த்த தேர்தல் ஆணைக்குழு அதற்கமைய, ஆணைக்குழுவின் தொலைநோக்கு, பணிக்கூற்று மற்றும் குறிக்கோள்கள் தயாரிக்கப்படல் வேண்டும் எனவும், அதற்கான முறையான திட்டமிடலொன்று காணப்படுவது அவசியமான முற்போக்கான நடவடிக்கை என்பதும் உணரப்பட்டது. கடந்த மூன்று தசாப்த காலப்பகுதியில் ஏற்பட்டுள்ள சமூக, அரசியல் மற்றும் கலாச்சார மாற்றங்களைக் கருத்திற் கொண்டு, தமது நிறுவனத்தின் முன்னேற்றத்திற்காக கூட்டுத் தொலைநோக்கொன்று இருப்பதன் அவசியத்தை உணர்ந்த தேர்தல் ஆணைக்குழுவினால் பங்களிப்பு மூலோபாயத் திட்டமொன்றைத் தயாரிப்பதற்கு ஏகமனதாகத் தீர்மானிக்கப்பட்டது. அனைத்துப் பங்குதாரத் தரப்பினரினதும் பிரதிநிதித்துவத்துடன் தேசிய மற்றும் பிரதேச மட்டத்திலான தகவல்கள், கருத்துக்கள் மற்றும் ஆலோசனைகளை ஒன்றுதிரட்டி பகுப்பாய்வு செய்து இந்தத்திட்டம் தயாரிக்கப்பட்ட காரணத்தால், இது ஒரு விசேடமான மற்றும் பாரியளவான முயற்சியின் பெறுபேறாக அமைந்தது.

நாட்டினுள் நீண்டகாலமாக நிலவிய ஆயுதப் போராட்டத்தினால் ஏற்பட்டுள்ள அரசியல் மாற்றங்கள், சமூக மற்றும் அரசியல் சீர்திருத்தங்களுக்குச் சாதகமான அடிப்படையில் தோற்றம் பெற்றுள்ள சூற்றாடல் மற்றும் உள்ளக மற்றும் வெளியக சூற்றாடல்களின் இயக்கத்தன்மை ஆகியவற்றைக் கருத்திற் கொண்டு, தமது பணிப்பொறுப்புக்களைப் பயனுள்ளதாகவும் வினைத்திறன் மிக்கதாகவும் நிறைவேற்றிக் கொள்ளக்கூடிய வழியை வகுத்துக் கொள்வதற்கும் புதிய ஆணைக்குழுவின் மூலோபாயத் திசைமுகப்படுத்தல்களை வலுப்படுத்திக் கொள்வதற்கும் வாய்ப்பு ஏற்பட்டுள்ளது.

பங்களிப்பு மூலோபாய திட்டமிடல் முறையானது வினைத்திறனான முகாமைத்துவத்தின் ஒரு புதிய அனுபவமாகும். நிறுவனத்தைச் சீராகக் கட்டமைப்பதற்கும் அதன் எதிர்காலத்தை முன்னிலைப்படுத்தியதுமான முகாமைத்துவ முறைமையான இது நிறுவனத்தின் நிகழ்ச்சித்திட்டங்கள் மற்றும் கொள்கை ரீதியான திசைமுகப்படுத்தலைச் சரியான முறையில் கையாள்கின்றது. ஆதலால், நான்கு ஆண்டுகளுக்கான செயல்திட்டம் ஒன்றைத் தயாரிக்கும் நோக்கில், அனைத்து மட்டத்திலுமுள்ள அலுவலர்கள் மற்றும் ஊழியர்களிடையே ஆழமான மற்றும் தனிப்பட்ட அர்ப்பணிப்பை ஏற்படுத்திக்கொண்டு தேர்தல் ஆணைக்குழுவின் நோக்கு, பணிக்கூற்று மற்றும் குறிக்கோள்கள் மற்றும் இலக்குகள் ஆகியவற்றைத் தயாரிப்பதற்காக இந்தத் திட்டமிடல் முறை பயன்படுத்தப்பட்டது. தேர்தல் ஆணைக்குழுவில் பணிபுரியும் ஒவ்வொருவருக்கும் கலந்துரையாடல் மேசையில் ஓர் இடமும், கருத்துக்களைத் தெரிவிப்பதற்காக வாய்ப்புக்களும் இச் செயற்பாட்டில் வழங்கப்பட்டன.

நடாத்தப்பட்ட செயலமர்வுகளின் போது, அலுவலர்கள் இனங்கண்ட மூலோபாய நோக்கங்களை அடைந்து கொள்வதற்காக உத்வேகமளித்து, தேர்தல் ஆணைக்குழுவின் தொலைநோக்கை உறுதிப்படுத்திக் கொள்வதற்கு இந்த பங்கேற்புத் திட்டமிடல் உதவியாக அமைந்தது.

தற்போது காணப்படுகின்ற மாற்றங்களை ஏற்றுக்கொண்டு, முரண்பாடுகளையும் மற்றும் மோதல்களையும் குறைத்துக்கொண்டு நிறுவனத்தில் மேற்கொள்ளப்பட வேண்டிய மாற்றங்களை அடையாளம் காண்பதற்கும், தடைகளை இனங்காண்பதற்கும், மாற்றங்கள் செய்யப்பட வேண்டிய சந்தர்ப்பங்களை அடையாளம் காண்பதற்கும் பங்களிப்பு மூலோபாய திட்டமிடல் செயல்முறை மிகவும் உறுதுணையாக அமைந்தது. இந்தப் பங்களிப்பு மூலோபாய திட்டமிடலில், அடிப்படைத் திட்டமிடல் எண்ணக்கருக்களான முக்கியமான/ நெருக்கடியான பிரச்சினைகள் தொடர்பான அணுகுமுறை (Critical Issue Approach) பலம், பலவீனம், வாய்ப்பு மற்றும் அச்சுறுத்தல் பற்றிய பகுப்பாய்வு (SWOT analysis) மற்றும் தர்க்கரீதியான கட்டமைப்பு அணுகுமுறை (Logical framework approach) ஆகியன சந்தர்ப்பத்திற்கு ஏற்றவாறு பயன்படுத்தப்பட்டதோடு அதன் மூலம் அடிப்படைச் செயலாற்றுகைக் குறிகாட்டிகள் (KPI) மற்றும் அனுமானங்கள் (Assumptions) என்பன கண்டறியப்பட்டன.

தேர்தல் ஆணைக்குழுவினால் 2017-2020 காலப் பகுதிக்காகத் தயாரிக்கப்பட்ட முதலாவது மூலோபாயத் திட்டம் வெற்றிகரமாக நடைமுறைப்படுத்தப்பட்டதோடு நாட்டில் எதிர்பாராத விதமாக பரவிய கொவிட் தொற்றுநோய் காரணமாக திட்டத்தை முழுமையான அடிப்படையில் செயற்படுத்துவதில் தடைகள் ஏற்பட்டன.

இருபதாவது அரசியலமைப்புத் திருத்தத்தின் பிரகாரம், 2020.12.10 ஆம் திகதி நியமனம் செய்யப்பட்ட இரண்டாவது தேர்தல் ஆணைக்குழுவும், தனது இலக்குகளை அடைந்து கொள்வதற்காக 2022-2025 காலப் பகுதிக்கான மூலோபாயத் திட்டத்தைத் தயாரிப்பதற்காக எடுக்கப்பட்ட கொள்கை ரீதியான தீர்மானத்துக்கமைய அதற்கான பணிகள் ஆரம்பிக்கப்பட்டன. அதன் பிரகாரம் முதலாவது திட்டத்தை முறையாக ஆய்வு செய்து பங்களிப்புத் திட்டமிடல் முறையைப் பின்பற்றி 2022-2025 காலப் பகுதிக்கான இரண்டாவது மூலோபாயத் திட்டம் தயாரிக்கப்பட்டு வெற்றிகரமாக நடைமுறைப்படுத்தப்பட்டது. எனினும், 2024 மற்றும் 2025 ஆம் ஆண்டுகளில் சனாதிபதித் தேர்தல், எல்பிட்டிய பிரதேச சபைத் தேர்தல், பாராளுமன்றத் தேர்தல் மற்றும் உள்ளூராட்சித் தேர்தல்கள் நடத்தப்பட்ட காரணத்தால், இத்திட்டத்தின் செயற்பாடுகளை முழுமையான அடிப்படையில் நிறைவு செய்வதற்கான வாய்ப்புகள் குறைவாகவே இருந்தன.

இருபத்தோராம் அரசியலமைப்பின் திருத்தத்தின் பிரகாரம் , 2023 ஆம் ஆண்டு யூலை மாதம் தாபிக்கப்பட்ட மூன்றாவது தேர்தல் ஆணைக்குழு, கடந்த நான்கு வருடகால மூலோபாயத் திட்டங்கள் இரண்டிலும் காணப்பட்ட செயற்பாடுகளிலிருந்து தொடர்ந்தும் செயற்படுத்தப்பட வேண்டிய செயற்பாடுகளை இனங்காணல், புதிதாகச் சேர்க்கப்பட வேண்டிய செயற்பாடுகளை இனங்காணல் மற்றும் தேர்தல் ஆணைக்குழுவின் நிர்வாகத்திற்கு அப்பாற்பட்ட காரணங்களால் செயற்படுத்துவதற்கு முடியாமல் போன செயற்பாடுகள் ஆகியவற்றை இனங்கண்டு, 2026-2029 காலப் பகுதிக்கான மூலோபாயத் திட்டம் தயாரிக்கப்பட்டதோடு, இது தொடர்பாக மாவட்ட மட்டத்திலும் மற்றும் தலைமை அலுவலகத்திலும் தொடர்புடைய அனைத்துப் பங்குதாரத் தரப்புக் குழுக்களுடனும் கலந்துரையாடல்கள் நடத்தப்பட்டு பங்களிப்பு மூலோபாயத் திட்ட வழிமுறை ஊடாக செயற்பாடுகளை இனங்காணல் மற்றும் திட்டம் தயாரித்தல் என்பன மேற்கொள்ளப்பட்டன.

இந்த மூலோபாயத் திட்டத்தின் மூலம் அதில் காட்டப்பட்டுள்ள மூலோபாய செயற்பாடுகளை ஆற்றிக்கொள்வதற்காக வருடாந்த செயல் திட்டங்கள் தயாரிக்கப்படுகின்றன. இதன் மூலம் குறுகிய கால, நடுத்தரக் கால மற்றும் நீண்ட கால அடிப்படையில் செயற்பாடுகளை இனங்காணல் மற்றும் நடைமுறைப்படுத்தல், காலாண்டு அடிப்படையில் முன்னேற்றத்தை மீளாய்வு செய்தல் மற்றும் இடையிலும் மற்றும் இறுதியிலும் மதிப்பீடுகளைச் செய்வதற்கு எதிர்பார்க்கப்படுகின்றது.